Breiðholtsskóli er heilstæður grunnskóli með nemendur í 1. til 10. bekk. Skólinn er í hverfi með blandaðri byggð sem er vel afmarkað landfræðilega og af fjölförnum umferðaræðum. Kjörorð skólans er “árangur fyrir alla” Skólinn er skipulagður með þeim hætti að kennarar sérhæfa sig í tilteknum fögum eða tveimur til þremur árgöngum. Lögð er áhersla á einstaklingsmiðað nám þar sem litið er á nemendur hvers árgangs sem eina heild. Námshópar eru því sveigjanlegir eftir viðfangs­efnum og aðstæðum.Auk almenns bóknáms, einkum lesturs er lögð áhersla er á kraftmiklar íþróttir, list- og verkgreinar. Öflugur stuðningur er við nemendur með sérþarfir bæði einstaklinga og hópa. Í skólanum eru starf­rækt fjögur námsver:

• Nýbúaver; fyrir börn með annað móðurmál en íslensku.
• Starfsver; fyrir eldri nemendur með verulegar atferlis- og námsraskanir.
• Stuðningsver; fyrir yngri nemendur með verulegar námsraskanir
• Næðisver; fyrir yngri börn sem þurfa tímabundið mjög gott næði til að ná einbeitingu og árangri í námi og hegðun.

Í skólanum er lagt upp með jákvæða hegðun og skýr viðmið og er unnið að innleiðingu á PBS hegðunar­kerfinu. Þar sem félagsmiðstöð ÍTR fyrir unglinga er utan hverfis er mikil þörf á félagsaðstöðu umfram það sem gengur og gerist. Mikil aðsókn hefur verið að Bakkaseli, tómstundaheimili ÍTR við skólann en auk þess hefur ÍTR í samvinnu við skólann rekið Perluna, sem er athvarf eftir skóla fyrir börn sem þurfa sérstaka aðhlynningu. Í Breiðholtsskóla er miðstöð Skólahljómsveitar Árbæjar og Breiðholts og fara þar fram bæði hóp­æfingar og einstaklingskennsla auk þess sem skrifstofa hljómsveitarstjóra er í skólanum.